ಮಳೆಗಾಲದ ಪಶ್ಚಿಮ ಘಟ್ಟದ ರೋಹಣ ಅನುಭವ ಭಾಗ - ೨ ನಿಮ್ಮ ಮುಂದಿಡಲು ಮನ ಉತ್ಸುಕವಾಗಿದೆ. ಈ ಭಾನುವಾರ ಬೈಕಿಂಗ್ನ ಮಜಾ ಅನುಭವಿಸುವ ತವಕದಿಂದ ಗೆಳೆಯರ ಜತೆಗೂಡಿ ಜೋಗ್ ಜಲಪಾತಕ್ಕೆ ಹೋಗುವ ಯೋಜನೆಯಾಗಿತ್ತು. ಅರಬ್ಬಿ ಸಮುದ್ರದಲ್ಲಿ ಹವಾಮಾನದ ಏರುಪೇರಿನಿಂದಾಗಿ, ಹಿಂದಿನ ಮೂರು ದಿನಗಳಿಂದಲೂ ಬಿಡದೆ ಮಳೆರಾಯ ಕಾಡುತ್ತಿದ್ದ. ಅದರಿಂದ ಜೋಗ್ ಜಲಪಾತಕ್ಕೆ ಬೈಕಿಂಗ್ ಮಾಡುವ ಇರಾದೆ ಮುಂದೂಡಿ ಎರ್ಮೈ ಜಲಪಾತ ಹಾಗು ಚಾರ್ಮಾಡಿ ಸುತ್ತಾಡಲು ಬೆಳ್ಳಂಬೆಳಗ್ಗೆ ಹೊರಟೆವು.
ಕಾರಿಂಜ ಕ್ರಾಸ್ ನಲ್ಲಿ ಭಟ್ಟರ ಹೋಟೇಲ್ ನಲ್ಲಿ ಬೆಳಗ್ಗೆ ತಿಂಡಿ ಮುಗಿಸಿ ಎರ್ಮೈ ಜಲಪಾತಕ್ಕೆ ಪ್ರಯಾಣ ಮುಂದುವರೆಯಿತು. ಮಳೆಗಾಲದಲ್ಲಿ ಬೈಕಿಂಗ್ ಮಾಡುವ ಖುಷಿ ಅನುಸ್ಮರಣೀಯ. ಆದರೆ ಅಷ್ಟೇ ಭಯಾನಕ ಕೂಡ. ಸ್ವಲ್ಫ ಎಡವಿದರೂ ಆಸ್ಫತ್ರೆ ಪ್ರಯಾಣ ಗ್ಯಾರಂಟಿ.
ಸುಮಾರು ೮.೩೦ಕ್ಕೆ ಗೆಳೆಯನ ಮನೆಗೆ ಬಂದಿಳಿದ ನಮಗೆ ಅಮ್ಮ ಮಾಡಿಕೊಟ್ಟ ಚಾಯ್ ಮೈ ಬಿಸಿ ಮಾಡಿತು. ಗೆಳೆಯನ್ನು ಕೂಡಿಸಿಕೊಂಡು ಎರ್ಮೈ ಜಲಪಾತಕ್ಕೆ ಹೊರಟ ನಮಗೆ ಹಳ್ಳಿಯ ಹಾದಿಯ ಬೈಕಿಂಗ್ ಕಲರ್ ಸಿನಿಮಾದಲ್ಲಿ ತೋರಿಸಿದಂತೆ ಮೋಹಕವಾಗಿತ್ತು.
ಸುಮಾರು ೯ ಗಂಟೆಗೆ ಜಲಪಾತದ ಹಾದಿ ಹಿಡಿದ ನಾವು ಗ್ರಾಮಸ್ಥರೇ, ನದಿಗಳಲ್ಲಿ ಸಿಗುವ ಕಲ್ಲುಗಳಿಂದ, ಕಾಡು ಬಳ್ಳಿ ಹಾಗು ಅಡಿಕೆ ಮರಗಳನ್ನು ಬಳಸಿ ನಿರ್ಮಿಸಿದ ಸೇತುವೆ ದಾಟಿ ಮುಂದುವರೆದೆವು. ಕರಾವಳಿ, ಮಲೆನಾಡಿನ ಗ್ರಾಮಗಳಲ್ಲಿ ಇದು ಸಾಮಾನ್ಯವಾದರೂ, ಅದನ್ನು ನಿರ್ಮಿಸಿದ ಗ್ರಾಮಸ್ಥರನ್ನು ಮೆಚ್ಚಲೇ ಬೇಕು. ನದಿಯಲ್ಲಿ ಸಿಗುವ ಕಲ್ಲುಗಳನ್ನು ಹಾಗು ಕಾಡು ಬಳ್ಳಿಗಳನ್ನು ಬಳಸಿ ನಿರ್ಮಿಸಿದ ಆಧಾರ ಸ್ತಂಭ ಈಗಿನ ತಾಂತ್ರಿಕತೆಗೆ ಸವಾಲಾಗದೆ ಇರದು.
ದಾರಿಯುದ್ದಕೂ ಕಾಣುವ ಹಸಿರು ಚಾರಣಿಗರ ಉಸಿರಲಿ ತಂಪನ್ನೆರೆಯುವುದು. ಸ್ಪಟಿಕ ಸ್ಪಷ್ಟ ಹೊಳೆ ನೀರು ಮನಸೋಲಿಸುತ್ತದೆ. ದಾರಿ ಪಕ್ಕದಲ್ಲಿ ಗ್ರಾಮಸ್ಥರ ಮನೆಗಳನ್ನು ಕಾಣಬಹುದು. ಕೆಲವೇ ದಿನಗಳ ಹಿಂದೆ ಕಾಡಾನೆಗಳು ಬೇಟಿಕೊಟ್ಟಿರುವುದಕ್ಕೆ ಅವುಗಳು ಹಾಕಿದ ಲದ್ದಿಗಳೇ ಸಾಕ್ಷಿ.
ನೀರ ದಾರೆಗಳ ಪಕ್ಕ ಇಂತಹ ಜಲವಿದ್ಯುತ್ ಸ್ಥಾವರಗಳು ಕೂತೂಹಲ ಮೂಡಿಸುತ್ತವೆ. ಜಲವಿದ್ಯುತ್ ಇಲ್ಲಿನ ಗ್ರಾಮಸ್ಥರ ಬೆಳಕಿನ ಮೂಲ ಕೂಡ. ಇದು ಸುಮಾರು ೫ ಮನೆಗಳಿಗೆ ದಿನದ ೨೪ ಗಂಟೆ ವಿದ್ಯುತ್ ಪೂರೈಸುತ್ತದೆ.
ಎರ್ಮೈ ಜಲಪಾತದ ಹಾದಿಯಲ್ಲಿ ಸಿಗುವ ಚಿಕ್ಕ ಜಲಪಾತ ಮನಸೋರೆಗೊಳ್ಳುತ್ತದೆ.
ಎರ್ಮೈ ಜಲಪಾತ ನೋಡುಗರ ಗಮನ ಸೆಳೆಯುವುದೆ ಹೀಗೆ. ಅಧ್ಬುತ ಚಿತ್ರಣ ಕಣ್ಮಣ ಸೆಳೆಯುವುದೆ ಹೀಗೆ. ಸುಮಾರು ೧೫ ಮೀಟರ್ ಎತ್ತರದಿಂದ ದುಮುಕುವ ಈ ಜಲಪಾತ ಎರಡು ಹಂತಗಳಲ್ಲಿ ಬೀಳುತ್ತದೆ. ಅದರ ನೋಟವೇ ಸುಂದರ. ಜಲಪಾತದ ನೀರು ಮೈಚಳಿ ಹಿಡಿಸುತ್ತದೆ. ಸೂರ್ಯನ ಕಿರಣಗಳು ಜಲಪಾತದ ಮೆರಗನ್ನು ಹೆಚ್ಚಿಸುತ್ತ ಅತ್ಯುನ್ನತ ಚಿತ್ರಣ ಕಣ್ಮಂದೆ ಇಡುತ್ತದೆ. ಸ್ಪಟಿಕರೂಪಿ ನೀರು ಬೆಳಕನ್ನು ಪ್ರತಿಬಿಂಬಿಸುವುದು ಮನಸ್ಸಿನಲ್ಲಿ ಪ್ರತಿಫಲನವೆಬ್ಬಿಸುತ್ತದೆ.
ಎರ್ಮೈ ಜಲಪಾತದ ವಿಶೇಷಗಳಲ್ಲೊಂದು ಅದು ಬೀಳುವ ಬಂಡೆಯ ಮಧ್ಯೆಯ ಜಾಗ. ಜಲಪಾತದ ಬದಿಯಲ್ಲಿ ಬಂಡೆ ಹತ್ತಲು ಕ್ಲಿಷ್ಟಕರ ದಾರಿಯಿದೆ. ಅದರೊಳಗೆ ಸುಮಾರು ೧೦ ಜನ ಕೂರಲು, ಮಲಗಲು ಪ್ರಾಶಸ್ತ್ಯ ಜಾಗ ಇದೆ. ರಾತ್ರಿ ಕಳೆಯಲು ಇದಕ್ಕಿನ್ನ ಪ್ರಶಸ್ತ್ಯ ಜಾಗ ಇಲ್ಲಿ ಬೇರಿಲ್ಲ. ಬಂಡೆಗಳ ಮಧ್ಯೆ ತೆವಳಿಕೊಂಡು ಸಾಗಿ ಜಲಪಾತದ ನಡುವನ್ನು ಮುಟ್ಟಿ ನೀರು ದುಮುಕುವ ಬಲವನ್ನು ಕಂಡುಕೊಳ್ಳಬಹುದು. ಇದು ಅತ್ಯಂತ ಆನಂದವನ್ನು ಜೊತೆಗೆ ಭಯವನ್ನು ಉಂಟುಮಾಡುತ್ತದೆ.
ಬಂಡೆಗಳ ಮಧ್ಯದಿಂದ ಕೇಳಗೆ ನೋಡುವಾಗ ಹೆದರಿಕೆಯುಂಟಾಗುವುದು ಮಾತ್ರ ಸತ್ಯ. ಮನಸ್ಸು ಅಬ್ಬಾ! ಅಂತು. ಪ್ರಕೃತಿಯು ಮೋಡಿಮಾಡುತ್ತಾ ಸಾಗುತ್ತದೆ.
ಜಲಪಾತದ ಬಂಡೆಗಳ ಮಧ್ಯೆ ಕಾಣಸಿಗುವ ಚಿತ್ತಾರ ಇವು... ಪ್ರಕೃತಿ ಹೃದಯ ವಿಶಾಲ...
ಸುಮಾರು ೧೧.೩೦ ಕ್ಕೆ ಮನಸ್ಸಿಲ್ಲದ ಮನಸಲಿ ವಾಪಾಸು ಹೊರಟ ನಾವು ಮತ್ತೆ ಗೆಳೆಯನ ಮನೆಗೆ ಬೇಟಿಯಿತ್ತು ಬಿಸಿಬಿಸಿ ಚಾಯ್ ಕುಡಿದು, ಬೆಲ್ಲ ಕಬ್ಬನ್ನು ಕಟ್ಟಿಕೊಂಡು ಚಾರ್ಮಾಡಿ ಕಡೆ ಹೊರಟೆವು.
